మన సంస్కృతి సాంప్రదాయాల పరిరక్షణలో గత ఐదు దశాబ్దాలు గా విశేష కృషిని, తెలుగు భాషా సంస్కృతుల పరిరక్షణే ధ్యేయంగా .. ఎన్నో తెలుగు సంస్థలకు మాతృకుగా అనేక సేవలు అందిస్తున్న మన టి ఎల్ సి ఎ గౌరవ ప్రతిష్టలను కాపాడుతూ .. ఈ సంపదను మన భావితరాల వారికి అందించి వారిని మన వారసులుగా తీర్చిదిద్దాలి అనే దృఢసంకల్పము తో మీ ముందుకు వస్తున్నాను .

టి.ఎల్.సి.ఎ వేదిక మీద తెలుగు భాష ప్రదర్శనకు అత్యంత ప్రాధాన్యతను ఇవ్వటం, పద్యానికి పట్టం కట్టటం, మన ఇతిహాసాల మీద పిల్లలకు పూర్తి అవగాహన కల్పించటమే ల‌క్ష్యంగా కార్య‌క్ర‌మాలు చేపడుతున్నాం.

టి.ఎల్.సి.ఎ కార్యక్రమాలలో చిన్నారులుగా పాల్గొన్న‌వారు యువ‌త‌గా మనకు దూరం అవుతున్నారు. మన సంఘంతో యువ‌త అనుబంధం కొన‌సాగాలంటే వారినే భాగ‌స్వాములుగా చేసి వారిచే కార్య‌క్ర‌మాలు చేప‌ట్టాల్సిన అవ‌స‌రం ఉంది. యువత తరచుగా కలిసేలా వేదిక‌లు ఏర్పాటుచేసి, వారిలో స్నేహ భావం పెంపొందించి, తద్వారా వారి ప్రమేయంతో కార్యక్రమాలు నిర్వహించటం, ఈ సంవత్సరం మేము తలపెట్టిన అతి ముఖ్య కార్యక్రమం.

వినోద కార్యక్రమాలు, తెలుగు సాహిత్య కార్యక్రమాలు, యోగ సాధన లాంటి కార్యక్రమాలు య‌థావిధిగా కొనసాగుతాయి.

ఏభై ఏళ్ల‌కు పైగా మన టి.ఎల్.సి.ఎ కు వెన్నుదన్నుగా వుంటూ, సహృదయంతో ఆర్ధిక సహకారాన్ని అందిస్తూ సంస్థ యొక్క పురోభివృద్ధికి తోడ్పడుతున్న దాతలకు, సంస్థ చేపట్టిన అన్ని కార్యక్రమాలను విజయవంతం చేస్తున్న సభ్యులకు, మన తెలుగు సంఘం నిర్వహించే అన్ని కార్యక్రమాలలో పాల్గొంటున్న చిన్నారులకు, తల్లిదండ్రులకు, గురువులకు, సంస్థ దీర్ఘ కాలిక అభివృద్ధికి దోహద పడుతున్న ధర్మకర్తల మండలికి (BOT) ,సంస్థకు సారథ్యం వహించి ముందుకు తీసుకు వెళ్ళటానికి చక్కని బాటను ఏర్పాటు చేసిన మన సంఘ పూర్వాధ్యక్షులకు, పూర్వ కార్యవర్గ సభ్యులకు, ముఖ్యంగా మన ప్రవాస తెలుగు వారందరికీ .. నా హృదయ పూర్వక ధన్యవాదాలు తెలుపుతూ అదేవిధముగా మీ అందరి ఆదరాభిమానలను కోరుకుంటూ.. “భాషే మన బంధం - యువతే మన భవిత”

మీ
నెహ్రూ క‌ఠారు
టీఎల్ సీఏ 2023 అధ్య‌క్షులు